Personeli mjekësor është vaksinuar i pari ndaj virusit A/H1N1. në ambientet e spitalit infektiv në QSUT janë vaksinuar gjatë paradites mjekët, infermjerët dhe pjesa tjetër e stafit që janë në kontakt të drejtpërdrejtë me pacientët e prekur me gripin e derrit. Ndërkohë vaksina do të dërgohet edhe në qendrat shëndetësore ku mund të vaksinohen ndaj këtij virusi grupet e riskut si fëmijët , të sëmurët kronikë dhe gratë shtatzëna.

“Personeli shëndetësor i shërbimeve të infektivit i qendrave të terapisë intensive në të gjithë vendin, në të 12 spitalet rajonale dhe QSUT ka filluar vaksinimi i personelit mjekësor. Nesër vaksina do jetë disponibël edhe për qendrat shëndetësore të Tiranës dhe të rretheve të tjera gradualisht për tu vënë në dispozicion të grupeve të tjera të riskut sic janë, fëmijët e vegjël apo të sëmurët kronikë. Vaksina dhe vaksinimi është falas.” shpjegon mjeku infeksionit Pëllumb Pipero.

Gjatë javëve të fundit, mbi 300 persona në Shqipëri janë prekur nga virusi A/H1N1, i njohur ndryshe si virusi i gripit të derrit, ndërkohë që gjashtë të tjerë kanë gjetur vdekjen prej tij, mes të cilëve edhe një grua shtatëzënë.

Tags: virusit A/H1N1